Erantzukizun soziala duten eta solidarioak diren herritar aktiboak garatzea du helburu EHUren i(ra)kaskuntzak. Konpetentzia eta gaitasun zientifikoak, teknologikoak, sozialak, humanistikoak eta sorkuntza artistikokoak bereganatzeko bideak eta bitartekoak eskaintzen ditu ikasleen garapen pertsonala eta profesionala eta konpromiso soziala bultzatzeko. Hori guztia ingurune konplexu eta eleaniztunean, eta testuinguru ziurgabe batean, non oinarrizko eta espezializatutako ezagutzak nahiz zeharkako gaitasunak eta trebetasunak premiazkoak diren. Ildo horretan, beharrezkoa da i3 hezkuntza ereduari bultzada ematen jarraitzea, GJHekin konprometitutako irakaskuntza berrikuntzako esparru berria den aldetik, diziplinarteko prestakuntza indartuta, baita zeharkako gaitasunak eta gaitasun digitalak ere.

Ardatz honen inguruko estrategiak unibertsitatean eskaintzen den irakaskuntza eta formakuntza maila guztiak kontuan hartzea eskatzen du: gradua, graduondokoa (unibertsitate masterra, berezko tituluak —prestakuntza jarraituko masterra, espezializazio diploma, aditu diploma— eta doktoregoa) eta etengabeko prestakuntza edo etengabeko ikaskuntza (mikrokredentzialak, unibertsitate hedakuntzako diplomak eta ikastaroak eta Esperientzia Gelak). Era berean, beharrezkoa da irakaskuntza emateko modalitateei eta ezagutza eskuratzeko moduei buruz hausnartzea: prestakuntza duala, praktikak gehitzea, talde-lana, irakaskuntza-ikaskuntza prozesu hibridoak eta onlinekoak, prestakuntza eleaniztuna eta abar. Modalitate horietan guztietan, diziplinarteko lankidetza ekimenak egin daitezke EHUko ikastegien artean eta baita EHUren eta beste unibertsitate batzuen artean ere; hitzarmen ugari ere egin daitezke beste eragile batzuekin, bai gaitasun praktikoak eskuratzeko, bai aitortutako gaitasuna duten erakunde akademikoak atxikitzeko.